Björgólfur lagður inn á sjúkrahús

Björgólfur Takefusa, leikmaður KR, þurfti að dvelja á sjúkrahúsi eina nótt eftir að hann meiddist á æfingu með KR fyrir skemmstu.

Björgólfur var ekki með KR gegn Keflavík á sunnudagskvöldið en hann meiddist á æfingu fyrir leikinn.

„Hann fékk högg á lærið sem hann taldi ekki vera mjög alvarlegt," sagði Logi Ólafsson, þjálfari KR, í samtali við Vísi í dag. „En síðan ágerðist þetta eftir að hann fór heim um kvöldið. Hann ákvað því að fara á slysavarðsstofu til að fá bólgueyðandi lyf. En þá kom í ljós að þetta var það alvarlegt að hann var lagður inn."

„Þegar það blæðir inn á vöðvann kemur mikill þrýstingur á aðra vöðva í kring og hætta á súrefnisskorti. Þar með gæti komið drep í vöðvann. Í þeim tilfellum gæti þurft að framkvæma uppskurð til að hleypa blóðinu út."

Logi sagði að það hefði þó ekki komið til þess en að það kemur í ljós næstu daga hvort hann geti spilað með KR gegn Fram á sunnudaginn.

„Við erum í fríi í dag en við munum sjá til hvernig vöðvinn bregst við áreiti á morgun. Bólgan hefur þó hjaðnað mikið."

Hann segir þetta hafa vissulega verið áfall fyrir Björgólf. „Þetta voru vissulega slæmar fréttir fyrir hann enda er hann búinn að standa sig vel."