Wolves búið að bjóða í Kevin Doyle

Sky Sports fréttastofan hefur heimildir fyrir því að nýliðar Wolves séu búnir að bjóða 6,5 milljónir punda í Kevin Doyle hjá Reading en framherjinn mun vera með ákvæði í samningi sínum um að b-deildarfélagið verði að samþykkja svo hljóðandi kauptilboð.

Doyle sló eftirminnilega í gegn með Reading í ensku úrvalsdeildinni og skoraði 19 mörk á tveimur leiktíðum í efstu deild. Hann lék svo með Reading í b-deildinni en þá tókst félaginu ekki að vinna sig aftur í deild þeirra bestu eftir tap gegn Burnley í umspili.

Doyle hefur einnig verið orðaður við Everton og talið er líklegt að knattspyrnustjórinn David Moyes muni blanda sér í baráttuna um Doyle með því að leggja fram 6,5 milljón punda kauptilboð á allra næstu dögum.