Harmar umfjöllun um viðkvæmt barnaverndarmál

Barnavernd Reykjavíkur harmar að viðkvæm málefni barns, sem nýtur stuðnings starfsmanna Barnaverndar Reykjavíkur, hafi orðið tilefni umfjöllunar í fjölmiðlum og í netheimum síðustu daga. Í tilkynningu frá Barnavernd Reykjavíkur kemur fram að starfsmenn hennar séu bundnir trúnaði um málefni einstakra barna og geti því aldrei útskýrt eða varið ákvarðanir og ferli nema í lokuðu þinghaldi fyrir dómsstólum eða gagnvart öðrum eftirlitsaðilum. Þessi trúnaður sé bæði lagalegur og siðferðilegur og snúi að því að vernda hagsmuni þeirra barna sem starfsmenn barnaverndar vinni fyrir og aðstandenda þeirra.

Tilefni fréttatilkynningarinnar er frásögn fjölmiðla af máli tveggja drengja, en yngri drengurinn var tekinn úr umsjá ömmu sinnar fyrir síðustu helgi og hefur verið vistaður á vistheimili á Laugarásvegi. Í tilkynningunni frá Barnavernd Reykjavíkur segir að ferli þessa tiltekna máls hafi verið yfirfarið sérstaklega og telji Barnavernd að þar hafi verið unnið með bestu hagsmuni barnsins að leiðarljósi. Starfsmenn hjá Barnavernd Reykjavíkur taki tillit til allra aðstæðna barna í þeim málum sem þeim sé falið að sinna, leitist við að styðja börnin í þroska þeirra og tryggja öryggi þeirra. Unnið er eftir lögum, ferlum og reglum. Ákvarðanir séu teknar af teymum eða eftir atvikum barnaverndarnefnd, eftir ítarlega yfirferð mála, ekki af einstökum starfsmönnum.

Barnavernd segir að samkvæmt barnaverndarlögum séu allar tillögur barnaverndarstarfsmanna um forræðissviptingu lagðar fyrir barnaverndarnefndir til ákvörðunar. Barnaverndarnefndir og barnaverndarstarfsmenn lúti eftirliti Barnaverndarstofu. Komi upp ágreiningur um ákvarðanir og vinnslu mála geta aðstandendur barna kært meðferð mála til Barnaverndarstofu, kærunefndar barnaverndarmála, félags- og tryggingamálaráðuneytis og dómsstóla, allt eftir eðli máls.

Í þessu tiltekna máli hafi lögmaður móður barnsins kært málið til kærunefndar barnaverndarmála. Barnaverndarnefnd Reykjavíkur muni jafnframt á næstu dögum fjalla um málið. Komi eitthvað nýtt upp í málinu verði það tekið upp aftur