Mótmæla kjaralækkandi aðgerðum Reykjavíkurborgar

„Starfsmenn Reykjavíkur hafa sætt lakari kjörum en aðrir, undir því yfirskyni að þeir byggju í staðinn við atvinnuöryggi. Það hlýtur því að sæta furðu að þegar á þetta atvinnuöryggi reynir skuli þeir þurfa að greiða það enn hærra verði," segir í ályktun sameiginlegs félagsfundar Fræðagarðs, Kjarafélags viðskiptafræðinga og hagfræðinga, Stéttarfélags bókasafns- og upplýsingafræðinga og Stéttarfélags lögfræðinga, sem haldinn var í dag.

Í tilkynningu frá Reykjavíkurborg segir að um tímabundnir aðgerðir sé að ræða. Yfirvinna verði endurskoðuð og starfsfólki ekki sagt upp.

Ályktunin í heild sinni:

„Félagsfundurinn mótmælir harðlega þeim launalækkunaraðgerðum sem Reykjavíkurborg hefur er gripið til gagnvart starfsmönnum sínum. Aðgerðir þessar og aðferðafræði sú sem beitt er við þær brjóta flest grundvallaratriði í samskiptum aðila á vinnumarkaði.

Það er óásættanlegt að stærsta sveitarfélag landsins skuli á þennan máta ráðast á ráðningarkjör starfsmanna, án þess að hafa í raun leitað allra annarra leiða til lausna á fjárhagsvanda borgarinnar. Starfsmenn Reykjavíkur hafa sætt lakari kjörum en aðrir, undir því yfirskyni að þeir byggju í staðinn við atvinnuöryggi. Það hlýtur því að sæta furðu að þegar á þetta atvinnuöryggi reynir skuli þeir þurfa að greiða það enn hærra verði.

Alvarlegast er þó að þessar aðgerðir eru keyrðar fram án þess að samráðs væri leitað við starfsfólk um aðrar hugsanlegar leiðir og þær eru lagðar fram undir ógn hugsanlegra uppsagna, sem borgin muni grípa til fái hún ekki sínu framgengt.

Félagsfundurinn krefst þess að Reykjavíkurborg virði lög- og samningsbundinn rétt starfsmanna sinna. Breytingar á ráðningarkjörum sæta sama uppsagnarfresti og ráðningarmál almennt, sem hjá Reykjavíkurborg eru 3 - 6 mánuðir hjá fastráðnum starfsmönnum.

Fundurinn krefst þess jafnframt að jafnræðis verði gætt í öllum aðgerðum borgarinnar, þannig að þær verði ekki misíþyngjandi fyrir starfsmenn eftir sviðum.

Ennfremur krefst fundurinn þess að verði aðgerðum þessum framfylgt verði nýjum samningum við starfsmenn sett skýr og ákveðin tímamörk og að þeim loknum taki fyrri launakjör við aftur."