Ólögleg veðmálastarfsemi alvarlegra vandamál en lyfjamisnotkun

Forystumenn íþróttasambanda hafa miklar áhyggjur veðmálum tengdum íþróttaviðburðum. Sérstök eftirlitsstofnun kemur því til með að fylgjast með veðmálum á vetrarolympíuleikunum í Vancouver á næsta ári.

Á Olympíuleikunum í Aþenu fyrir 5 árum var töluvert um að íþróttamenn og stunduðu veðmál og á leikunum í Peking í fyrra var öllum þeim sem tóku þátt í leikunum bannað að stunda veðmál á keppnisgreinar á Olympíuleikunum.

Knattspyrnusamband Evrópu (UEFA) rannsakar núna 40 leiki úr forkeppni meistaradeildarinnar og Evrópukeppni félagsliða frá undanförnum 4 árum, 15 þeirra frá síðustu og þar síðustu leiktíð. Varaforseti World Lottery Association, Risto Nieminen, segir í samtali við enska dagblaðið Guardian, að vandinn sé miklu meiri en menn haldi. Ólögleg veðmálastarfsemi er meiri ógnun við íþróttirnar en lyfjanotkun", segir Nieminen.

Þá hefur enska knattpyrnusambandið verið með um þrjátíu mál um ólögmæta veðmálastarfsemi inni á borði hjá sér undanfarin ár. Eitthvað er um að ólögleg veðmál hafi komið upp í efstu deildunum á Englandi en árið 2000 var til að mynda Steve Claridge, leikmaður Portsmouth, dæmdur sekur fyrir að veðja á sigur liðs síns gegn Barnsley í ensku b-deildinni. Hinn 43 ára gamli Claridge, sem leikur nú í utandeildinni með Weymouth, er einn víðförulasti leikmaður enska fótboltans en hann á að baki yfir 1000 leiki með fimmtán ólíkum félögum á Englandi.