Pepsi-deild kvenna: Valur og Breiðablik með sigra

Valur og Breiðablik leiðast hönd í hönd á toppi Pepsi-deildar kvenna eftir leiki kvöldsins. Bæði lið unnu örugga sigra í kvöld og eru með 19 stig í efsta sætinu. Valur á toppnum með betri markatölu.

Valur rúllaði yfir stigalaust, botnlið Keflavíkur í kvöld, 0-11. Anna Garðarsdóttir skoraðu fernu fyrir Val og þær Dóra María Lárusdóttir og Kristín Ýr Bjarnadóttir skoruðu báðar þrennu.

Blikar lögðu ÍR, 3-0, með mörkum frá Heklu Pálmadóttur, Hörpu Þorsteinsdóttur og Fanndísar Friðriksdóttur.

Fylkir og Stjarnan skildu jöfn, 3-3, í stórleik kvöldsins. Stjarnan þar með tveim stigum á eftir toppliðunum. Anna Sigurðardóttir skoraði tvívegis fyrir Fylki og Rúna Stefánsdóttir skoraði einnig. Anna Björk Kristjánsdóttir, Björk Gunnarsdóttir og Edda María Birgisdóttir skoruðu fyrir Stjörnuna.

KR-stúlkur hifu sig upp frá botnsvæðinu með 2-0 sigri á GRV. Sonja Björk Jóhannesdóttir og Guðný Guðleif Einarsdóttir skoruðu mörk KR í leiknum.

Þór/KA gerði svo góða ferð í Mosfellsbæinn þar sem liðið lagði Aftureldingu/Fjölni, 1-3. Rakel Hönnudóttir skoraði tvívegis fyrir norðanstelpur og Bojana Besic einu sinni. Sigríður Þóra Birgisdóttir skoraði mark heimastúlkna.

Upplýsingar um markaskorara eru fengnar frá fótbolti.net.