Hallarbylting hjá Newcastle?

Terry Venables gæti orðið næsti knattspyrnustjóri Newcastle ef fréttir af því að leikmenn liðsins hafi misst trú á settum knattspyrnustjórum liðsins reynast réttar.

The Sun segir að leikmenn Newcastle hafi litla trú á þeim Chris Hughton og Colin Calderwood sem stýrt hafa liðinu síðan Joe Kinnear þurfti að láta tímabundið af störfum vegna veikinda.

Tap Newcastle fyrir Arsenal á heimavelli um helgina þýðir að liðið er í þriðja neðsta sæti deildarinnar þegar aðeins átta leikir eru eftir.

"Leikmennirnir hafa verið að tala um að þeir þurfi einhvern almennilegan mann til að leysa vanda liðsins. Það er enginn leiðtogi í liðinu síðan Kinnear veiktist. Það er ekki það að þeir beri ekki virðingu fyrir Houghton sem þjálfara - hann er bara ekki knattspyrnustjóri;" er haft eftir innanbúðarmanni hjá Newcastle í Sun.

Þetta er ekki í fyrsta skipti sem Venables er orðaður við Newcastle, en hann er einn þeirra manna sem leitað var til eftir að Kevin Keegan hætti hjá félaginu.