Leit hafin að nýjum stjóra

Bruce Buck, stjórnarformaður Chelsea, segir að forráðamenn félagsins hafi hafið leitina að nýjum knattspyrnustjóra til að taka við Guus Hiddink.

Hiddink samdi við Chelsea til loka tímabilsins en hefur þvertekið fyrir því að halda áfram starfi sínu fyrir félagið í núverandi mynd. Hann útilokar þó ekki að vera félaginu áfram innan handar sem ráðgjafi en muni þó einbeita sér fyrst og fremst að rússneska landsliðinu þar sem hann er þjálfari.

„Guus Hiddink kom hingað tímabundið fyrir tveimur mánuðum síðan og var það rússneska knattspyrnusambandinu að þakka að það var mögulegt að fá hann," sagði Buck. „En þetta er tímabundin lausn. Það hefur verið mikið fjallað um að hann verði mögulega áfram en það er bara ekki tilfellið."

„Það er núna undir stjórn félagsins komið að finna nýjan knattspyrnustjóra sem verður ráðinn til framtíðar. Sú vinna er hafin og mun halda áfram. Allt annað um þessi mál eru einungis vangaveltur."

Jose Mourinho hefur verið sagður á leið aftur til Chelsea en Buck á ekki von á því.

„Í sannleika sagt finnst mér það ólíklegt. Jose var frábær þjálfari og er frábær náungi en ég held að hans tími hjá Chelsea sé liðinn."