Auðun Helgason: Bara gult spjald

Auðun Helgason segir Eyjólf dómara hafa tekið rétt spjald upp úr vasanum ólíkt áliti Ólafs í öðru viðtali hér á Vísi eftir jafntefli Breiðabliks og Fram.

"Það er brotið á Almarri og dæmd aukaspyrna. Ég kem og fer að skipta mér að málum. Tek boltann og færi hann á réttan stað. Mér fannst þetta vera langt inni í teig eins og öllum öðrum þarna. Svo kemur Arnar aðvífandi og ég bregst eitthvað illa við svo það var réttilega gult spjald," sagði Auðun.

"Við vorum ekki mættir í byrjun. Við vissum að Blikar eru með vel spilandi og gott lið. Við ætluðum ekki að gefa þeim tíma á boltann og svo fá þeir að leika lausum hala fyrsta hálftímann og þá lendum við 3-0 undir."

"Við fórum rólegir inn í seinni hálfleikinn og höfðum allan tíman trú á þessu. Við vissum að þeir hafa gloprað niður unnum leikjum og það var gott að hafa það veganesti inn í seinni hálfleikinn. Með mikilli þolinmæði og krafti náðu við stigi sem var gott úr því sem komið var."

"Við getum spilað mikið betur en það er í öðru og þriðja markinu að okkur tókst að láta boltann fljóta og við fengum aðeins tíma en við getum spilað mikið betur en þetta."

"Þessi stígandi okkar undanfarið lýsir sér kannski í því að við höfum trú á að geta komið til baka þrátt fyrir að vera 3-0 undir í hálfleik. Við erum komnir lengra en á sama tíma í fyrra. Við höfum spilað vel undanfarið en ekki nógu vel í dag, við getum betur," sagði Auðun að lokum.