Orri Hjaltalín: Hroðaleg einstaklingsmistök

„Á móti liði eins og FH höfum við einfaldlega ekki efni á að gera svona mistök," sagði Orri Hjaltalín, fyrirliði Grindavíkur, eftir tapið gegn Íslandsmeisturunum í kvöld.

„Við bara komum þeim í 2-0. Við áttum bara ekki möguleika vegna þess. Það voru hroðaleg einstaklingsmistök sem við vorum að gera í þessum mörkum. Mér fannst þetta annars vera í ákveðnu jafnvægi úti á vellinum," sagði Orri. „Við erum að spila mjög langt undir getu. Fyrir þennan leik var lagt upp með ákveðna taktík en því miður eru bara of margir leikmenn sem eru ekki að fara eftir því. Ég er aldrei sáttur við að tapa og sérstaklega ekki eins og við gerðum það í dag."