Bjarni: Kraftur, hraði og flott spil

Bjarni Jóhannsson er þjálfari Stjörnunnar og hann var vitaskuld ánægður eftir stórsigur sinna manna gegn Frömurum.

"Við mættum ferskir eftir hléið í deildinni og áttum frábæran fyrsta hálftíma hér í dag. Við settum Framara svolítið útaf laginu í upphafi en við sýndum mikinn kraft, hraða og flott spil á köflum. Ég vil meina að við höfum tekið það besta úr Keflavíkurleiknum með okkur í þennan leik og það skilaði þessu," sagði Bjarni í samtali við Vísi eftir leik.

Margir hafa búist við því að Stjarnan myndi tapa stigum eftir frábæra byrjun en Bjarni sagði jafnteflið í Keflavík hafa hjálpað þeim mikið. "Það skipti gríðarlegu máli að ná stigi á einum grjótharðasta útivelli landsins og það hjálpaði okkur mikið þegar við fórum inn í þetta hlé. Í svona ungu liði þá hleypir það sjálfstrausti í menn," bætti Bjarni við.

Stemmningin hjá stuðningsmönnum Stjörnunnar var góð í kvöld og Bjarni sagði það mikilvægt. "Það er auðvitað frábært að sjá hugarfar drengjanna í þessu móti. Þegar menn eru ungir og óreyndir að taka sín fyrstu skref í þessu þá hefur svona stuðningur eins og er á pöllunum gríðarlega þýðingu og þetta lið hefur auðvitað bara staðið sig mjög vel,"

Arnar Már Björgvinsson var í fyrsta skipti í byrjunarliðinu í kvöld en samt sem áður er hann markahæstur í deildinni með 6 mörk. "Hann nýtir sín tækifæri gríðarlega vel og hefur gert það í allan vetur. Þetta var fínn leikur hjá honum í dag," sagði Bjarni um markahæsta mann deildarinnar.

Stjörnuliðið eru nýliðar í deildinni og í 2.sæti deildarinnar eftir 7 umferðir. "Ég veit ekki hvort við eigum að setja okkur sérstakt markmið. Við reynum bara að fara eins langt og við getum og sjá til hvað það dagar," sagði Bjarni að lokum í samtali við Vísi.