Boro neitar að selja Downing

Middlesbrough hefur hafnað beiðni Stewart Downing um að vera settur á sölulista. Þá hefur félagið einnig neitað kauptilboði frá Tottenham í leikmanninn.

Downing vill yfirgefa Middlesbrough en stjórnarmenn félagsins hyggjast ekki sleppa honum. Keit Lamb, formaður stjórnarinnar, segir að beiðni Downing hafi verið tekin fyrir á fundi í dag og henni síðan hafnað.

Hann sagði í samtali við Sky að Downing væri einfaldlega ekki til sölu. Þá segir hann það sama gilda um Gary O'Neil sem er á óskalista Portsmouth.

Tottenham bauð einnig í Jermain Defoe, sóknarmann Portsmouth í dag. Portsmouth vill fá 15 milljónir punda fyrir leikmanninn en félögin hafa enn ekki náð samkomulagi um kaupverðið samkvæmt BBC.