Liverpool búið að bjóða í Lavezzi

Umboðsmaður framherjans Ezequiel Lavezzi hjá Napoli segir Liverpool vera búið að leggja fram kauptilboð í Argentínumanninn en Manchester City er einnig talið vera á eftir leikmanninum.

„Liverpool er búið að bjóða í Lavezzi. Það er nú undir Napoli komið hvað gerist í þessu," segir umboðsmaðurinn Eduardo Rossetto í samtali við Gazzetta dello Sport.

Hinn 24 ára gamli Lavezzi hefur ekki farið leynt með vilja sinn um að yfirgefa herbúðir Napoli og skrifaði meðal annars opið bréf til aðdáenda félagsins í síðustu viku þar sem hann kvartaði sáran yfir því að honum væri ekki sýnd nægilega mikil virðing.

Lavezzi á að baki tvo landsleiki fyrir Argentínu og getur spilað sem framherji eða framsækinn miðjumaður.