Gagnrýnir tímabundnar ráðningar ráðherra

Eygló Harðardóttir, þingmaður Framsóknarflokksins, gagnrýnir hvernig ráðherrar standa að tímabundnum ráðningum. Hún segir gegnsæi skorta og að ráðherrar hafi ráðið pólitíska aðstoðarmenn í stöður sem hafi ekki verið auglýstar.

„Það virðist vera algjör skortur á gagnsæi sem margir hafa talað um. Það eru ýmsir sem sitja í ríkisstjórn núna sem töluðu mikið áður um mikilvægi þess að störf hjá hinu opinbera væru auglýst," segir Eygló og bætir við að ráðherrar hafi margir hverjir verið duglegir að undanförnu að ráða sér aðstoðarmenn og að störfin hafi ekki verið auglýst.

Eygló tiltekur sérstaklega ráðningar Einars Karls Haraldssonar, fyrrverandi aðstoðarmanns Össurar Skarphéðinssonar, í stöðu upplýsingafulltrúa forsætisráðuneytisins og Kristrúnar Heimisdóttur, fyrrverandi aðstoðarmanns Ingibjargar Sólrúnar Gísladóttur, sem lögfræðings í félagsmálaráðuneytinu í verkefnum sem snúa að endurskoðun á lánum heimilanna.

Þingmaðurinn hefur lagt fram fyrirspurn á Alþingi til forsætisráðherra um aðstoðarmenn ráðherra og tímabundnar ráðningar. „Ég hef ekki séð þessi störf auglýst. Menn virðast vera að fara í kringum þetta með svokölluðum tímabundnum ráðningum," segir Eygló.

Eygló hefur áhyggjur af þessum vinnubrögðum. „Það er mikið atvinnuleysi og mikið af hæfu fólki sem hefði jafnvel áhuga á að sækja um þessi störf. Þetta þarf allt að vera upp á borðinu."

Aðspurð segir Eygló að vilji ráðherrar hafa fleiri en einn aðstoðarmann verði að taka um það pólitíska ákvörðun og breyta lögum sem geri það mögulegt.