Aston Villa komið alla leið í úrslitaleikinn

Aston Villa tryggði sér í kvöld sæti í úrslitaleik Friðarbikarsins eftir 2-1 sigur á Porto og þrátt fyrir að þurfa að leika manni færri frá 69. mínútu leiksins. Villa mætir annað hvort Real Madrid eða Juventus í úrslitaleiknum á sunnudaginn.

Emile Heskey skoraði fyrra mark Aston Villa á 14. mínútu og Steve Sidwell bætti við öðru marki á 37. mínútu. Portúgalska liðið náði ekki að minnka muninn fyrr en úr vítaspyrnu í lok leiksins en úr henni skoraði Givanildo Vieira de Souza.

Emile Heskey var rekinn útaf á 69. mínútu þegar hann brást illa við eftir að brotið var á Ashley Young.