Atkvæðagreiðsla um ESB umsókn hafin

Atkvæðagreiðsla um aðildarumsókn að Evrópusambandinu hófst á hádegi. Það gæti þó liðið smá tími þar til að niðurstaða hennar verður ljós því þingmenn flykkjast nú í pontu til að gera athugasemdir við atkvæðagreiðsluna.

Við það tækifæri áréttaði Steingrímur J. Sigfússon þá skoðun Vinstri hreyfingarinnar - græns framboðs að það þjóni ekki hagsmunum Íslands að gerast aðili að Evrópusambandinu. Í þeirri atkvæðagreiðslu sem fram færi núna væri verið að greiða atkvæði um það hvers konar samningi sé hægt að ná.

Steingrímur sagði að þingmenn væru engu bundnir við atkvæðagreiðsluna nema samvisku sinni. Íslendingar áskilji sér rétt til þess að slíta viðræðum hvenær sem er, skili umræðurnar ekki árangri sem og að hafna samningnum.