Carvalho hefur ekkert rætt við Mourinho

Eins og fram kom í morgun þá hefur ítalska félagið Inter áhuga á að fá bæði Deco og Ricardo Carvalho frá Chelsea.

Carvalho hefur áður gefið í skyn að hann vilji fara en hann segir málið vera á algjörum byrjunarreit. Hann hafi ekki rætt við neinn og svo hafi ekki verið gert tilboð í sig.

„Ég veit af áhuga Inter. Félögin þurfa samt fyrst að ná saman áður en ég geri eitthvað. Ég er enn með samning við Chelsea," sagði Carvalho.

„Ég hef ekki talað við Mourinho í háa herrans tíð og ég hef heldur ekki rætt við nýja stjórann okkar. Ég mun hitta forráðamenn Chelsea í næstu viku og fara betur yfir málið," sagði Portúgalinn.