Yfirlýsing frá Keflavík: Svona gerum við ekki

Knattspyrnudeild Keflavíkur hefur sent frá sér yfirlýsingu vegna flöskukasts stuðningsmanna Keflavíkur á KR-velli í gær.

Þá var einni flösku kastað inn á völlinn og annarri í stuðningsmenn KR.

Yfirlýsing Keflvíkinga hljómar svona:

Svona gerum við ekki.

Kæru stuðningsmenn. Þrátt fyrir ljótt tap okkar manna gegn KR á sunnudag þá gerum við ekki svona, eins og einn stuðningsmaður okkar gerði að henda flösku inn á völlinn og annar henti flösku í átt að KR-ingum en slíkur gjörningur getur haft slæmar afleiðingar fyrir knattspyrnudeildina. Það er skiljanlegt að menn séu svekktir þegar liðið okkar er að tapa en þá skulum við frekar syngja og hvetja okkar menn en gera svona hluti. Það eru ekki margir leikir sem Keflavík tapar og þegar það gerist skulum við taka því eins og sannir stuðningsmenn. Svo ég hvet þá sem hér eiga hlut að máli að hugsa næst um að hrópa áfram Keflavík frekar en kasta frá sér reiðinni.

Áfram Keflavík.

Þorsteinn Magnússon, formaður knattspyrnudeildar Keflavíkur.

Við þetta má bæta að í Fréttablaði morgundagsins verður rætt við einstaklinginn sem kastaði kók-flöskunni inn á völlinn sem fór næstum í Prince Rajcomar.