150 sóttu um tíu störf í utanríkisráðuneytinu

150 umsóknir bárust í tíu störf í þýðingarmiðstöð utanríkisráðuneytsins. Fram hefur komið í fréttum að ráðuneytið hafi auglýst eftir tíu þýðendum vegna þess að þýðingarmiðstöð ráðuneytisins hafi ekki annað verkefnum sínum í tengslum við þýðingar vegna EES samningsins. Fjölga þarf þýðendum til að vinna upp uppsafnaðan hala en ekki hafa verið gerðar ráðstafanir vegna aðildarviðræðna. Ekki er útilokað að þýðingarmiðstöðin bæti tíu þýðendum við til viðbótar innan tíðar og þá væntanlega vegna aðildarviðræðnanna.

Samtök verslunar og þjónustu skora á utanríkisráðuneytið, að nýta sér einkafyrirtæki, þegar kemur að auknum verkefnum í þýðingum, vegna aðildarviðræðna við Evrópusambandið. Utanríkisráðuneytið hyggist eins og áður sagði fjölga starfsfólki þýðingarmiðstöðvar ráðuneytisins til að mæta aukinni þýðingaþörf. Hins vegar séu starfandi fjölmörg einkafyrirtæki sem gætu vel sinnt þeirri vinnu sem framundan er á vegum ráðuneytisins eða annarra opinberra aðila. Þannig megi nýta opinbert fé betur en ella.