Hundrað dagar liðnir frá stjórnarmyndun - Flest málin í höfn

Í dag eru hundrað dagar liðnir frá því að meirihlutastjórn Samfylkingarinnar og Vinstri hreyfingarinnar græns framboðs tók til starfa. Stærstu málin af 100 daga áætlun sem ríkisstjórnin lagði þá fram eru enn óleyst þó að flest málin séu komin í höfn.

Sex málum af 48 er ólokið, en mörg þeirra eru langt komin í vinnslu. Það mál sem hefur sennilegast verið fjallað mest um er að fyrsta endurskoðun Alþjóðagjaldeyrissjóðsins vegna efnahagsáætlunar Íslendinga verði afgreidd í stjórn AGS. Þá átti mikilvægum samningum til lausnar vegna erlendra eigenda krónubréfa að vera lokið. Það átti að vera búið að draga úr gjaldeyrishöftum. Loks má nefna að búið átti að vera að auglýsa stöður bankastjóra.