Ólafur Kristjánsson: Rangur litur á spjaldinu

Ólafur Kristjánsson þjálfari Breiðabliks var að vonum svekktur eftir að hafa horft á lið sitt missa niður þriggja marka forskot gegn Fram í kvöld.

"Við erum með 3-0 forystu í hálfeik og það gerist ekki fyrstu 25 mínúturnar í seinni hálfleik. Framarar voru kraftmiklir að sækja þetta stig í seinni hálfleik, þetta var algjör rússíbani."

"Það gerist eitthvað í undirmeðvitundinni að menn gerðu ekki það sem þeir ætluðu að gera. Við vorum með góða stöðu og áttum að láta kné fylgja kviði í seinni hálfleik. Það var deyfð í leiknum og mér fannst dapurt að við skyldum ekki nýta okkur það."

"Við töluðum um að sækja leikinn og vera aktívir en við vorum passívir."

Umdeilt atvik gerðist þegar tíu mínútur voru til leikhlés. Fram fær aukaspyrnu rétt fyrir utan teig þar sem leikmenn liðsins vilja fá víti. Auðun Helgason fer með boltann inn í teig þar sem hann telur brotið hafa átt sér stað og Arnar Grétarsson kemur til að reka Auðun og boltann út úr teignum. Við það veitist Auðun að Arnari en fær aðeins gult spjald fyrir.

"Auðvitað var ekki réttur litur á spjaldinu. Ég sá ekki betur en að hann hafi tekið Arnar hálstaki og það er með ólíkindum að hann hafi fengið að vera inni á vellinum eftir það."

"Þetta hafði ekki úrslitaáhrif á leikinn. Allur taktur í leiknum var furðulegur og sá sem átti að stjórna honum hélt ekki utan um það en við misstum þetta ekki niður útaf hans frammistöðu heldur útaf okkar klaufaskap og þeirra dugnaði."