Kaka hafnaði Manchester City

Brasilíski knattspyrnumaðurinn Kaka hefur hafnað því að fara til Manchester City. Silvio Berlusconi, eigandi AC Milan, tilkynnti þetta á ítalskri sjónvarpsstöð nú í kvöld.

City ætlaði að gera Kaka að dýrasta leikmanni sögunnar með því að kaupa hann á yfir 100 milljónir punda. Kaka er í guðatölu hjá stuðningsmönnum AC Milan sem hafa mikið látið í sér heyra síðustu daga.

Kaka hefur áður sagt að hann vilji vera áfram hjá AC Milan og ljóst að seðlarnir í Manchester hafa ekki náð að heilla hann. Hann fundaði með forráðamönnum AC Milan í dag og bað um að öllum viðræðum við City væri slitið.