Stelpurnar lentu aftur á móti Frökkum

Íslenska kvennalandsliðið í knattspyrnu þarf að spila enn og aftur gegn Frökkum í undankeppni HM 2011 en búið er að draga í riðla. Úrslitakeppnin sjálf fer fram í Þýskalandi.

Aðrar þjóðir í riðli Íslands eru Serbía, Norður-Írland, Króatía og Eistland. Sigurvegari riðilsins fer í umspil og sigurvegari umspilsins kemst síðan til Þýskalands.

Þetta er nokkuð flókið kerfi því tapliðin í umspilsleikjunum fara aftur í umspilsleiki og sigurvegari þess umspils fer svo í þriðju rimmuna við lið úr CONCACAF-riðlinum um sæti í úrslitakeppninni.

Leiðin til Þýskalands er því ekki beint greið.

Ísland var eins og fólk ætti að muna með Frökkum í riðli í undankeppni EM og eru einnig saman í riðli í úrslitakeppni EM sem fer fram í sumar.