Nýju reglur Alan Shearer hjá Newcastle

Alan Shearer er sestur í stjórastólinn hjá Newcastle og þó að það hafi ekki orðið breytingar á gengi liðsins í fyrsta leik þá er Shearer búinn að setja nýjar reglur fyrir leikmenn sína.

„Þetta er bara nokkur lítil atriði hér og þar. Ég held að leikmenn hafi viljað þetta sjálfir en af einhverjum ástæðum hafði þetta aldrei komið til," sagði Shearer í viðtali við staðarblaðið í Newcastle.

„Stundvísi er mér mjög mikilvæg og þá borðum við allir saman," sagði Shearer og hann ætlar líka að breyta hlutunum hjá þeim leikmönnum sem eru á meiðslalistanum.

„Meiddu leikmennirnir þurfa að vera hér þar til seinni part dagsins. Ég vonast til að það hafi góð áhrif á að stytta meiðslalistann. Leikmenn eru ekki hrifnir af því að vera svo lengi, er það nokkuð," spyr Shearer blaðamann.

Alan Shearer er vinsæll meðal stuðningsmanna Newcastle og hann leggur áherslu á að allir leikmenn sinni þeim. Allir leikmenn þurfa þannig að bíða og skrifa eiginhandaáritanir eftir æfingar á meðan að einhver stuðningsmaður bíður eftir að fá áritun.