Loftið hreinsað hjá Sunderland

Craig Gordon, markvörður Sunderland, segir að leikmenn hafi hreinsað það slæma andrúmsloft sem ríkti á milli sumra þeirra eftir 2-0 tap liðsins fyrir West Ham um síðustu helgi.

Sunderland er ekki nema þremur stigum frá fallsæti og þarf nauðsynlega á stigum að halda til að forðast frekari fallbaráttu.

Leikmenn voru bersýnilega pirraðir á meðan leiknum stóð um síðustu helgi en Gordon vonast til að öll þau mál séu nú útkljáð.

„Við ræddum málin eftir æfingu á þriðjudag og fengum nokkur mál á hreint. Það er rétta leiðin til að glíma við þessi mál - að ræða þá og vinna með þau."

„Þetta var mjög uppbyggilegt og vonandi getum við nýtt okkur þetta í næsta leik. Það eina sem við getum gert er að laga mistökin sem við gerðum í leiknum gegn West ham og sjá til þess að við gerum þau ekki aftur."