Breska kirkjan ekki ánægð með ensku úrvalsdeildina

Enska úrvalsdeildin hefur verið gagnrýnd harðlega af mörgum kirkjum í Birmingham fyrir að leikur Aston Villa og Everton skuli fara fram á Páska-sunnudegi.

„Við skiljum að venjulegur sunnudagur er í dag orðinn vinnudagur hjá mörgum en páskasunnudagur er allt annað mál. Það er aðeins jóladagur sem er honum ofar í heilagleika. Með því að setja leiki á páskasunnudag þá er enska úrvalsdeildin að líta á hann eins og hvern annan dag," sagði í yfirlýsingu frá níu kirkjum í nágrenni Villa Park þar sem umræddur leikur fer fram.

Leikur Aston Villa og Everton fer fram klukkan 13.00 á sunnudag að breskum tíma. „Um 1000 manns verða í vinnu við leikinn og geta því ekki tekið þátt í hátíðarhöldum annaðhvort í krikju eða með sínum fjölskyldum. Þetta eru lögreglumenn, veitingarfólk og starfsmenn á vellinum," sagði ennfremur í umræddri yfirlýsingu.

Kirkjunarmenn hafa miklar áhyggjur af straumur áhorfenda á leikinn muni líka hafa mikil áhrif á fólk sem er á leið til krikju. Í Bretlandi er þetta einn stærsti dagurinn á kirkjuárinu þegar kemur að aðsókn að messum.

Annar leikur fer fram á sunnudaginn en það er leikur Manchester City og Fulham sem hefst klukkan 15.10. Enska úrvalsdeildin ætlar ekki að breyta þessum leikjum en ætlar að fjármagna enn frekari löggæslu í tengslum við leikina.