Ásmundur: Meðan það er möguleiki þá er möguleiki

„Við vissum alltaf að þetta yrði erfiður leikur en höfðum alveg trú á verkefninu og ætluðum okkur að gera eitthvað," sagði Ásmundur Arnarsson, þjálfari Fjölnis, eftir tapið gegn Íslandsmeisturum FH í dag.

„Við komum nokkuð sprækir til leiks og fengum fín upphlaup og færi til að skora. Svo fáum við ódýrt mark snemma leiks eftir einbeitingarleysi. Menn eru að spá í öðrum hlutum þegar FH á langan bolta fram og eftir hann kemur fyrsta markið."

„Við vorum að spila oft á tíðum betur en klaufaskapur hjá okkur að klára ekki tækifærin," sagði Ásmundur. Fjölnismenn voru tveimur mörkum undir í hálfleik en minnkuðu muninn snemma í seinni hálfleik. Þeir náðu þó ekki að fylgja því marki eftir.

„Vinstri bakvörðurinn okkar var á annarri löppinni og þeir skora sitt þriðja mark þegar hann situr meiddur eftir frammi. Eftir það mark var erfitt að fylgja þessu eftir. Annars vorum við að spila ágætis bolta."

Fjölnir er í erfiðri stöðu í næstneðsta sæti deildarinnar. Liðið er fimm stigum á eftir ÍBV sem er sæti ofar en Eyjamenn eiga tvo leiki til góða á Grafarvogsliðið. „Það segir sig sjálft að þetta er erfitt og verður strembið. Meðan það er möguleiki þá er möguleiki. Við berjumst áfram," sagði Ásmundur.