Stjórnmálamenn þurfa að hlusta á sjónarmið lögreglunnar

„Þessi sjónarmið að það á ekki ekki að ganga nærri lögreglunni á þessum tímum eru sjónarmið sem ég hef haldið skýrt á lofti. En það eru stjórnmálamennirnir sem þurfa að hlusta á þessi sjónarmið sem koma úr öllum áttum innan lögreglunnar," segir Stefán Eiríksson, lögreglustjóri á höfuðborgarsvæðinu.

Vísir sagði frá neyðarkalli lögreglumanns sem fréttastofu barst og var birt á vefnum í morgun. Þar lýsti lögreglumaður undir nafnleynd vinnuumhverfi sem formaður Landssamband lögreglunnar, Snorri Magnússon, hefur sagt vera óásættanlegt.

Stefán vill ekki tjá sig efnislega um bréfið þar sem hann sagðist ekki hafa lesið það. Hann sagði hinsvegar að það væri ekkert launungarmál að löggæslustofnanir um allt land horfðu fram á niðurskurð. Tæplega fimmtíu starfsmenn lögreglunnar um land allt munu missa vinnu sína um áramótin. Niðurskurðurinn nemur rúmum fimmtíu milljónum króna.

Að sögn Stefáns er það fyrst og fremst stjórnmálamanna að svara fyrir það.

„Allir eru að reyna sitt besta og álagið er að aukast," segir Stefán um lögreglumennina sem starfa víða um land, oft við erfiðar aðstæður eins og bréfið lýsti.

Dómsmálaráðherrann, Ragnar Árnadóttir, vildi ekki tjá sig efnislega um bréfið sem lögreglumaðurinn sendi inn.

Vísir hefur fengið gríðarleg viðbrögð frá lögreglumönnum eftir að fyrsta fréttin barst.

Þar af hefur Vísir borist nokkur bréf til viðbótar frá lögreglumönnum sem vildu ekki að nöfn þeirra yrðu gefin upp. Allir lýsa þeir svipuðum kringumstæðum og var greint frá í fyrstu fréttinni. Ljóst er, af bréfunum að dæma, að mikil ólga er á meðal starfsmanna innan lögregluembættisins.