Leikir helgarinnar á Englandi

Manchester United getur komist á toppinn í ensku úrvalsdeildinni á morgun þegar liðið sækir Bolton heim, en liðið verður þá án framherjans Wayne Rooney sem er meiddur á læri.

Rooney verður líklega frá í um þrjár vikur en auk hans eru þeir Patrice Evra (ökklameiðsli), Rio Ferdinand (bak), Wes Brown (ökkli) og Owen Hargreaves (hné) fjarri góðu gamni.

Chelsea getur fagnað því að varnarjaxlinn Ricardo Carvalho er búinn að ná sér af meiðslum sem hann varð fyrir í bikarleiknum gegn Southend á dögunum og ætti því að verða klár gegn Stoke á morgun. Þá verða þeir Didier Drogba og Florent Malouda klárir þrátt fyrir smávægileg meiðsli. Miðjumaðurinn Deco verður hinsvegar ekki með og sömu sögu er að segja af Joe Cole sem haltraði af velli meiddur á hné. Ekki hefur verið skorið úr um hve lengi hann verður frá.

Arsenal sækir Hull heim í kvöldleiknum á morgun en þar er möguleiki á að kamerúnski landsliðsmaðurinn Alex Song verði með Arsenal á ný eftir meiðsli sem hann varð fyrir í síðasta mánuði. Svo gæti farið að Kevin Kilbane léki sinn fyrsta leik fyrir Hull eftir að hann var keyptur frá Wigan, en Hull verður án miðjumannsins George Boateng næstu mánuðina.

Liverpool og Everton mætast í grannaslag á mánudagskvöldið og þar vonast rauðir eftir að sjá Fernando Torres í byrjunarliði, en hann hefur komið inn sem varamaður í síðustu tveimur leikjum.

Manchester City hefur heldur betur verið í umræðunni undanfarið og á morgun endurheimtir liðið Brasilíumanninn Robinho úr ökklameiðslum þegar það mætir Wigan. Ekki er ólíklegt að enski landsliðsmaðurinn Wayne Bridge spili sinn fyrsta leik fyrir City eftir að hafa komið frá Chelsea. Shaun Wright Phillips er tæpur hjá City vegna meiðsla á læri.

Sunderland verður án Steed Malbranque (leikbann) þegar liðið sækir Aston Villa heim á morgun, en endurheimtir Phil Bardsley eftir veikindi. Villa er í fjórða sæti deildarinnar og er á góðu skriði um þessar mundir.

Á morgun er loks á dagskrá harður fallslagur þar sem Middlesbrough tekur á móti West Brom. Boro hefur ekki unnið sigur í níu leikjum í röð, en svo gæti farið að Marc-Antoine Fortune léki sinn fyrsta leik í byrjunarliði West Brom eftir að hann kom á lánssamningi frá Nancy í Frakklandi. Roman Bednar er í leikbanni hjá West Brom.