Aldraður þjóðverji í fimm ára fangelsi fyrir fíkniefnasmygl

Dieter Samson tæplega sjötugur þjóðverji var á föstudag dæmdur í fimm ára fangelsi fyrir að hafa smyglað um tuttugu kílóum af hassi og rúmlega 1,7 kílói af amfetamíni til landsins. Samson var handtekinn þegar hann kom til landsins með Norrænu á Seyðisfirði í byrjun september.

Fíkniefnin flutti hann til landsins í Honda Accord Sedan bifreið sinni en efnin voru falin í farangursgeymslu, varadekki og niðursuðudósum.

Fyrir dómi hélt Dieter því fram að hann hefði ekki vitað að fíkniefni væru falin í bílnum, þótt hann gerði sér grein fyrir því að ekki væri allt með felldu um ferðina.

Við aðalmeðferð málsins sagði hann að rússneskir kunningjar sínir búsettir í Þýskalandi hefðu fengið hann til þess að fara þessa ferð. Hafi þeir keypt fyrir hann bíl til ferðarinnar á 2500 evrur og skyldi bíllinn vera hans eign.

Þá hafi þeir einnig greitt ferðakostnaðinn fyrir hann. Hafi honum verið sagt að þegar hingað kæmi ætti hann að hitta mann við Perluna og fengi hann þá greiddar 5000 evrur fyrir ferðina og fengi frekari fyrirmæli. Kvaðst hann ekki hafa vitað hvort fíkniefnum hefði verið komið fyrir í bílnum eða þá hve miklu.

Þessi framburður mannsins er sagður fráleitur sérstaklega þegar sakaferill hans er hafður í huga, en Dieter á langan sakaferil að baki.

„Álítur dómurinn að hafi hann hlotið að vita að verulegt magn fíkniefna var meðferðis í bílnum og að þau væru flutt hingað í ágóðaskyni og væru ætluð til söludreifingar. Gegn neitun ákærða verður hins vegar að telja ósannað að hann hafi sjálfur átt fíkniefnin eða farið ferðina á eigin vegum," segir í dómnum.

Dieter var því dæmdur í fimm ára fangelsi eins og fyrr segir en 137 daga gæsluvarðhaldsvist hans kemur til frádráttar. Einnig voru umrædd efni gerð upptæk sem og bifreiðin og falsað letneskt ökuskírteini sem hann framvísaði við komuna hingað til lands.

Dieter var einnig gert aðg reiða málsvarnarlaun verjanda síns upp á 600.000 krónur og rúmlega 175 þúsund krónur í annan sakarkostnað.