Stefnt vegna ummæla viðmælanda

Guðríður Haraldsdóttir, ritstjóri Vikunnar, hefur hafnað samtals tíu milljóna króna miskabótakröfum fjölskyldu úr Sandgerði vegna umfjöllunar um málefni hennar í nýlegu tölublaði Vikunnar. Telur fjölskyldan að umfjöllunin, sem ekki var merkt höfundi, hafi verið full af grófum ærumeiðingum og að hún hafi brotið gegn friðhelgi einkalífs hennar. Fjölskyldan hyggst fara með málið fyrir dómstóla.

Í greininni er rætt við Valborgu Svanholt Níelsdóttur, sem ber þungar sakir á fyrrverandi eiginmann látinnar dóttur sinnar. Hún segir segir hann hafa beitt dóttur-dóttur sína ofbeldi og hafi rænt henni, hann skoði barnaklám og segir frá kærum á hendur honum fyrir misnotkun sem síðar voru felldar niður.

Tvö mál verða höfðuð á hendur Guðríði. Annað höfðar faðirinn, sem er bandarískur, og hitt höfðar hann ásamt núverandi konu sinni fyrir hönd þrettán ára dóttur þeirra, en konan hefur nú ættleitt hana. Í greininni er dóttirin nafngreind, fjallað um sjálfsvígshugleiðingar hennar og sálfræðiaðstoð, hún kölluð Öskubuska og birtar af henni myndir án hennar samþykkis.

Málin verða þingfest í Héraðsdómi Vesturlands í byrjun september. Vilhjálmur H. Vilhjálmsson, lögmaður fjölskyldunnar, segist meðal annars munu byggja á því að Birtíngur og blaðamenn útgáfunnar, þótt það eigi að sjálfsögðu ekki við um alla, séu síbrotamenn á þessu sviði, enda hafi hann unnið fimm meiðyrðamál gegn félaginu og starfsmönnum þess undanfarið ár og tvö vegna ólögmætra myndbirtinga.

Nýlegum dómi yfir blaðamanni Vikunnar, sem dæmdur var fyrir meiðyrði vegna ummæla viðmælanda, hefur nú verið vísað til Mannréttindadómstóls Evrópu með fulltingi Blaðamannafélagins.