Jónas Guðni: Ég er gríðarlega sáttur

„Já ég er gríðarlega sáttur við þennan leik. Við vorum rólegir á boltanum og héldum boltanum vel innan liðsins. Þegar við höldum boltanum eins vel og við gerðum í dag þá erum við hrikalega góðir," sagði Jónas Guðni Sævarsson eftir 4-1 sigur KR á Keflvíkingum. Jónas spilaði frábærlega og skoraði eitt mark.

„Fyrri hálfleikurinn var gríðarlega góður. Það sem að gerist svo í seinni hálfleik er að við dettum örlítið niður og ætluðum okkur að halda. Þegar við gerum það þá refsa Keflvíkingarnir," segir Jónas.

Þetta var fyrsti sigur KR á Keflavík í Frostaskjólinu frá 2001. „Já það gerir þetta enn sætara og það að ég hafi skorað gegn mínum gömlu félögum er mjög skemmtilegt."

Jónas hefur nú skorað tvö mörk á tímabilinu en það er nokkuð mikið miðað sögu hans í markaskorun. „Já ég er farinn aðeins að bæta í markaskorunina. Kominn með tvö á tímabilinu og stefni á að bæta við fleiri mörkum."

Jónas Guðni dvaldi á dögunum hjá sænska liðinu Halmstad og gæti því verið á förum frá KR. „Ég veit að þeir voru á leiknum hérna í dag og hafa mikinn áhuga. Það skýrist svo bara í vikunni hvort þeir geri tilboð eða ekki," segir Jónas og viðurkennir að vera áhugasamur. „Já þetta er stærri deild og stærri klúbbur. Betri fótbolti. Auðvitað er þetta skref upp á við en ég fer ekki án þess að gera þetta á réttu forsendunum."