Ronaldo getur ekki beðið eftir að byrja hjá Real

Cristiano Ronaldo er í viðtali við spænska blaðið Marca í dag þó svo umboðsskrfstofa hans hafi sagt í gær að hann myndi ekki gefa viðtöl á næstunni. Við vonum að þetta viðtal sé þó alvöru annað en skáldskapurinn sem var í News of the World um helgina.

„Eins og ég hef áður sagt þá er Real Madrid félag sem ég hef alltaf viljað spila fyrir. Það verður gaman að spila með Kaká en einnig með Raul, Casillas og Guti," sagði Ronaldo sem er búinn að gangast undir læknisskoðun hjá félaginu.

„Vonandi fæ ég tækifæri til þess að hvílast aðeins núna því samningaviðræðurnar eru ekki búnar. Ég vil samt fara vel af stað á undirbúningstímabilinu. Sannleikurinn er að ég get ekki beðið eftir að komast af stað með félaginu," sagði Ronaldo.

„Ég er ekki enn búinn að fá mér hús í Madrid en mun gefa mér tíma í að leita að húsi fljótlega. Ég vil einnig læra spænsku en nú mun ég hvílast eins og ég get til þess að vera í sem bestu standi þegar undirbúningstímabilið hefst.

„Ég veit að menn búast við miklu af mér en það truflar mig ekki því þannig er það alltaf."