Maicon opinn fyrir því að fara til Chelsea

Umboðsmaður Brasilíumannsins Maicon segir að leikmaðurinn sé opinn fyrir þeirri hugmynd að ganga í raðir Chelsea í sumar.

Leikmaðurinn hefur verið lengi undir smásjánni hjá Real Madrid en Chelsea er einnig talið hafa mikinn áhuga á að klófesta þennan leikmann Inter.

Maicon er hægri bakvörður og hinn nýi stjóri Chelsea, Carlo Ancelotti, sér Maicon sem góðan kost í þá stöðu.

„Ef að spennandi tilboð kemur þá erum við opnir fyrir öllu. Það er allt falt í þessum knattspyrnuheimi," sagði umboðsmaður Maicon.

„Ég tel að Ancelotti sé einn af helstu aðdáendum leikmannsins og hann er sjálfur opinn fyrir nýjum tilboðum. Það er rétt hjá forseta Inter að íhuga öll tilboð sem koma í hann. Maicon er ánægður hjá Inter en gerir sér grein fyrir því að hlutirnir geta breyst hratt."