Zola búinn að landa fyrsta leikmanninum af þremur?

Samkvæmt ítölskum fjölmiðlum hefur enska úrvalsdeildarfélagið West Ham náð samkomulagi við Ítalíumeistara Inter um eins árs lánssamning á miðjumanninum Luis Jimenez.

Knattspyrnustjórinn Gianfranco Zola lét hafa eftir sér á dögunum að Jimenez væri leikmaður að hans skapi og að hann vonaðist til þess að klófesta hinn 25 ára gamla landsliðsmann frá Chile, sem var einnig orðaður við erkifjendurna í Tottenham.

Jimenez er ánægður með að vera kominn í ensku úrvalsdeildina og til West Ham.

„Ég fylgdist vel með West Ham í lok síðustu leiktíðar og líkaði það sem ég sá. Félagið reynir að spila góðan fótbolta og ég vill taka þátt í því sem Zola er að reyna að skapa hjá félaginu. Ég er mjög ánægður með félagsskiptin," segir Jimenez í samtali við opinbera heimasíðu West Ham.

Scott Duxbury, forstjóri West Ham, staðfesti á dögunum í samtali við Sky Sports fréttastofuna að West Ham væri í viðræðum við þrjá leikmenn og nú er Jimenez kominn í hús á Upton Park, en Lundúnafélagið er einnig sterklega orðað við lánssamninga fyrir Mario Balotelli og Mancini hjá Inter.