United á svipað mál og Chelsea yfir höfði sér

Svo gæti farið að Manchester United verði dæmt í samskonar bann og Chelsea fékk frá Alþjóða knattspyrnusambandinu, FIFA, í gær.

Þá var greint frá því að Chelsea fengi ekki að kaupa nýja leikmenn til félagsins fyrr en í janúar 2011. Ástæðan var að félagið var sagt hafa beitt ólöglegum aðferðum við að lokka við sig ungan leikmann frá franska félaginu Lens árið 2007.

Annað franskt félag, Le Havre, sakar Sir Alex Ferguson og Manchester United um svipuð vinnubrögð þegar félagið fékk annan ungan Frakka, Paul Pogba, til að ganga til liðs við United.

Forráðamenn United neita því hins vegar staðfastlega að hafa gert nokkuð rangt.

„Þetta er alger þvæla. Það var allt gert innan regluramma Knattspyrnusambands Evrópu," sagði talsmaður United í samtali við enska fjölmiðla.

Alain Belsoeur, framkvæmdarstjóri Le Havre, er ekki sama sinnis og segir að félagið hafi sannanir fyrir því að United hafi brotið reglur UEFA og FIFA.

„Við erum enn að sækja okkar mál. Þetta er mjög alvarlegt mál. En við erum sannfærðir um að hafa betur því þjónar ekki aðeins tilgangi okkar heldur íþróttarinnar allar."

„Við eyðum fimm milljónum evra í okkar knattspyrnuakademíu ár hvert en velta félagsins alls er ekki nema tólf milljónir. Það er því gríðarlega mikil fjárfesting fyrir okkur."

„Við sinnum því svona vel til að fá góða leikmenn inn í aðalliðið okkar, ekki til að ala upp leikmenn fyrir önnur félög."

„Hver er tilgangurinn með því að fjárfesta í akademíum ef leikmennirnir fara sextán ára gamlir? Þetta er án nokkurs vafa skýr skilaboð frá FIFA um að vernda menntunarkerfið.“