Lou Hawthorne býður öryggisafritun dýra

Klónun dýra er nýjasta lausnin fyrir þá sem misst hafa gæludýr sín og afbera ekki harminn.

Fullar hendur fjár og óbilandi ást á gæludýri eru hráefnin sem þurfa að vera fyrir hendi ef einhvern langar að eignast klónað gæludýr. Í Bandaríkjunum eru 75 milljónir hunda og er að minnsta kosti einn hundur á 39 prósentum þarlendra heimila.

Síðan kindin Dolly var klónuð í Edinborg árið 1996 hafa margir gæludýraeigendur litið hýru auga til þessa umdeilda möguleika. Lou Hawthorne hjá Genetic Savings & Clone, hefur verið framarlega í þessum fræðum en eins hafa Kóreumenn verið atkvæðamiklir klónrannsóknarmenn, einkum Hwang Woo-Suk nokkur sem stundað hefur ítarlegar rannsóknir á klónun dýra við háskólann í Seoul í Suður-Kóreu.

Sá er einnig að dunda sér við að klóna stofnfrumur úr mönnum sem ekki hefur verið með öllu óumdeilt hin síðari ár. Hjá fyrirtæki Hawthornes kostar það litla 50.000 dollara að fá kött klónaðan og fullyrðir hann að eigandinn öðlist með því algjörlega skothelt afrit af dýrinu.