Caicedo með tilboð frá West Ham

Felipe Caicedo, landsilðsmaður frá Ekvador og leikmaður Manchester City, segir að West Ham hafi gert tilboð í sig.

Caicedo skoraði sjö mörk á nýliðinni leiktíð hjá Manchester City en talið er líklegt að hann fari frá félaginu ef það muni kaupa marga nýja leikmenn nú í sumar.

Hann sagði í samtali við fjölmiðla í heimalandi sínu að hann hafi fengið tilboð bæði frá West Ham og Sporting Lissabon.

„Það er ekkert öruggt enn," sagði hann. „En það eru fleiri félög sem hafa áhuga - svo sem frá Portúgal, Spáni og Englandi. Eina enska félagið sem ég get nefnt á nafn er West Ham."

En þrátt fyrir allan þennan áhuga er City sagt vera áhugasamt um að halda honum. „Ég á þrjú ár eftir af samningi mínum við City og mér hefur verið sagt að ég sé ekki á förum."