Útilokar ekki að semja þurfi á nýjan leik

Lilja Mósesdóttir, þingmaður Vinstri grænna, útilokar ekki að Íslendingar þurfi að semja á nýjan leik við Breta og Hollendinga um Icesave reikninga Landsbankans. Hún telur að viðbrögð þeirra við þeim breytingartillögum sem fjárlaganefnd samþykkti í fyrrinótt geta orðið með þeim hætti að semja þurfi upp á nýtt. Lilja er ánægð með niðurstöðu fjárlaganefndar, en hún hefur verið í hópi þeirra þingmanna VG sem hvað harðast hafa gagnrýnt Icesave samninganna.

Lilja var gestur Sigurjóns M. Egilssonar í þættinum Sprengisandi á Bylgjunni í morgun. Þar hrósaði hún Þór Saari, þingmanni Borgarahreyfingarinnar, fyrir að hafa tekist að sannfæra meirihluta fjárlaganefndar um að þeir fyrirvarar sem nefndin kom sér saman um væru besta efnahagslega viðmiðið sem setja ætti við ríkisábyrgðina.

„Fyrirvarinn gengur út á það að við borgum ekki ef það verður ekki hagvöxtur og hann kemur líka í veg fyrir að við tökum mikla gengisáhættu ef að samningarnir verða samþykktir," sagði þingmaðurinn.

Lilja fullyrti að um sögulegt samstarf væri ræða. „Þarna komu hagfræðingar saman úr öllum flokkum og störfuðu þvert á flokkslínur. Þetta er sögulegt að því leyti að við brutum á bak aftur það flokksræði sem hefur ríkt á þingi og notuðum fagþekkingu okkar til að tryggja hagsmuni almennings varðandi þessa Icesave samninga."

Lilja sagðist hafa viljað hafna samningunum en henni hafi orðið ljóst í byrjun ágúst að alþjóðasamfélagið væri að neyða Íslendinga til að semja um Icesave. Aftur á móti væru breytingartillögur fjárlaganefndar skilaboð um að Íslendingar vilji sanngjarnari samninga.