Leikskóla hugsanlega lokað vegna svínaflensu

Sex af 19 starfsmönnum leikskólans Aðalþings í Kópavogi hafa verið frá vinnu síðustu daga. Grunur leikur á að fjórir þeirra séu með svínaflensu.

Guðrún Alda Harðardóttir, leikskólastjóri, er hæfilega bjartsýn á að ekki þurfi að loka skólanum en foreldrum hefur engu að síður verið gert viðvart um stöðuna. Starfsfólkið hefur verið töluvert veikt en Guðrún telur að það hafi veikst áður en leikskólastarfið hófst á nýjan leik eftir sumarleyfi í byrjun ágúst. Hún telur því að tilviljun ráði því hversu margir starfsmenn hennar séu veikir. „Mér skilst að þetta sé eini skólinn í Kópavogi þar sem staðan er þessi."

„Það er rétt að það eru nokkrir starfsmenn búnir að vera veikir alla síðustu viku og það leikur sterkur grunur um að þeir séu með svínaflensu," segir leikskólastjórinn. Engin börn í leikskólanum hafa veikst eða sýnt flensueinkenni.

Guðrún segir að starfsfólk sitt hafi verið töluvert mikið veikt. „Þau hafa ekki fengið það í gegn að fá sýnatöku sem er slæmt fyrir svona skólastofnun en þannig verður það að vera."

Guðrún segir að stjórnendur leikskólans hafi unnið náið með leikskólayfirvöldum í Kópavogi og viðbragðsteymi bæjarfélagsins vegna svínaflensunnar. Þá hafi foreldrum verið gert viðvart í síðustu viku um stöðu mála og þeir beðnir um að vera í viðbragðsstöðu. Á föstudaginn þurftu foreldrar að sækja börn sín fyrr í leikskólann en þá var aukið álag á starfsfólk farið að segja til sín.

Guðrún er bjartsýn á að ekki þurfi að grípa til þess ráðs að loka leikskólanum. Eitthvað af starfsfólki hennar sé að hressast. „Ég er hæfilega bjartsýn á meðan að aðrir veikist ekki," segir leikskólastjórinn og bætir við að málið skýrist væntanlega strax í fyrramálið þegar leikskólinn opnar eftir helgarleyfi.