Kennir Ramos um söluna á Berbatov

Daniel Levy, stjórnarformaður Tottenham, segir að félagið hefði haldið Dimitar Berbatov ef Juande Ramos hefði ekki heimtað að hann yrði seldur.

Berbatov fór fram á að fá að fara til Manchester United eins og frægt varð, en stjórnarformaðurinn segir að hann hefði helst viljað halda framherjanum þrátt fyrir óánægju hans.

Það hafi hinsvegar ekki komið til greina í augum knattspyrnustjórans Juande Ramos og því hafi verið ákveðið að selja hann til United fyrir 30 milljónir punda.

"Við höfum aldrei keypt eða selt leikmann án þess að hafa grænt ljós frá knattspyrnustjóranum og það var Juande sem kaus að láta Dimitar fara - jafnvel þó við hefðum ekki mann í hans stað. Við hefðum haldið honum þó hann hafi óskað þess að verða seldur, en það er Juande sem velur liðið og hann vildi ekki hafa mann sem gæti skemmt liðsandann. Ég ákvað því að styðja hann í þessu," sagði Levy í samtali við Sun.