Terry: England skortir sjálfstraust

John Terry, fyrirliði enska landsliðsins, segir að erfiðleika liðsins undanfarin misseri megi rekja til þess að það skorti einfaldlega sjálfstraust.

Englendingar mæta Andorra í Barcelona í kvöld í undankeppni HM og leikmennirnir eru ekki búnir að gleyma því þegar áhorfendur bauluðu á þá síðast þegar þeir mættu smáliði Andorra.

Þá unnu Englendingar afar ósannfærandi 3-0 sigur gegn lágt skrifuðum andstæðingum sínum og voru baulaðir af velli í hálfleik þegar staðan var 0-0.

"Ef ég á að vera hreinskilinn eru leikmenn óttaslegnir við að gera mistök. Þannig hefur það verið síðustu tvö ár. Ég held að við náum ekki að breyta því á einu kvöldi," sagði Terry fyrirliði í samtali við BBC.

Hann vonar að enska liðið nái að vinna áhorfendur á sitt band og viðurkennir að það risti djúpt þegar stuðningsmennirnir baula.

"Hópurinn ætti að hafa sjálfstraust, en þannig er það ekki í augnablikinu. Sem fyrirliði er ég mjög stoltur að spila fyrir England og því svíður það mikið þegar baulað er á liðið. Við hurfum enn lengra inn í skelina þegar baulað var á okkur í leiknum á móti Andorra síðast. Við verðum að gleyma því sem fyrst," sagði Terry.