,,Við látum ekki kúga okkur"

Mótmælafundur fer nú fram á Austurvelli sjöunda laugardaginn í röð. Fólk var tekið að streyma að nú laust fyrir klukkan þrjú og Austurvöllur orðinn nokkuð þéttur. Bein útsending frá mótmælafundinum hófst á Vísi og í opinberi dagskrá Stöðvar 2 klukkan þrjú.

Skilti hafa verið sett á þinghúsið og það boðið til sölu. Ræðumenn dagsins eru Sindri Viðarsson sagnfræðinemi, Katrín Oddsdóttir laganemi og Gerður Pálma atvinnurekandi í Hollandi.

Hörður Torfason, tónlistarmaður og fundarstjóri, mótmælafundarins boðaði til fjöldamótmæla á Arnarhóli 1. desember klukkan 15 í tilefni þess að 90 ár verða þá liðin frá fullveldi Íslands. Hörður hvatti fólk til að leggja niður vinnu og mæta á Arnarhól.

Katrín sagði í ræðu sinni að ríkisstjórnin hafi brotið mannréttindi Íslendinga þegar fjármálaráðherra og seðlabankastjóri skrifuðu undir lánabeiðni til Alþjóðagjaldeyrissjóðsins. Katrín fullyrti að sjóðurinn hugsi fyrst og fremst um að komast yfir auðlindir þjóða sem leita á náðir hans.

Katrín sagði að Íslendingar eigi rétt á að leita til hlutlausra aðila til að úrskurða um skuldir sem landsmenn hafi ekki stofnað sjálfir til heldur hópur 30 manna. ,,Geir lét kúga sig," sagði Katrín. ,,Við Íslendingar látum ekki svipta okkur mannréttindum."

,,Þú bannar okkur ekki að kjósa Geir Hilmar og það gerir þú ekki heldur Ingibjörg sólrún," sagði Katrín og krafðist kosninga.

Katrín sagði að það væri stríðsyfirlýsing gagnvart íslensku þjóðinni að forsætisráðherra hefði ráðið norskan hernaðarráðgjafa til að stjórna fjölmiðlumfjöllun stjórnvalda.

Katrín rifjaði upp kosningaslagorð Sjálfstæðisflokksins frá því í aðdraganda þingkosninganna 2007. ,,Þegar á öllu er á botninn er á hvolft er það traust efnahagsstjórnr sem er stærsta velferðarmálið." Stærsta og mikilvægasta velferðarmálið þessa stundina að mati Katrínar er að þeim frá sem klúðruðu efnahagsstjórninni og endurreisa ný gildi.

,,Er það skrýtið að fólk vilji fara frá landi sem er stjórnað að fólki sem ekkert kann? Ekki einu sinni að skammast sín?" spurði Katrín.

Ríkisstjórnin þarf að víkja, að mati Katrínar. Forseti landsins þarf að mynda utanþingsstjórn með sérfræðinga innanborðs áður en gengið sé til kosninga.

Katrín sagði að friðsamleg mótmæli henti á friðartíumum en hér hafi verið gerð árás. Hún sagði að ríkisstjórnin hafi viku til að boða til kosninga annars verði þeir sem beri ábyrgð á efnahagshruninu bornir út. Íslendingar láti ekki sefa sig og þeir gleymi ekki.

,,Góðir Íslendingar. Við látum ekki kúga okkur," hrópaði Katrín að lokum.