Scolari ætlar að spila sóknarknattspyrnu

Enska úrvalsdeildarliðið Chelsea mun væntanlega bjóða stuðningsmönnum sínum upp á talsvert breytta leikaðferð þegar liðið hefur leik í deildinni í næsta mánuði.

Luiz Felipe Scolari ætlar að blása til sóknar og láta af varnarboltanum sem einkenndi liðið undir stjórn Jose Mourinho og Avram Grant.

"Ég hugsa að verði meiri ævintýramennska í sóknarleik okkar - við ætlum amk að reyna það. Ég get ekki svarað því hvort það tekst fyrr en í júní á næsta ári," sagði Brasilíumaðurinn.

Fílstrendingurinn Salomon Kalou tekur undir orð knattspyrnustjórans og telur Chelsea verða skemmtilegra lið á að horfa á komandi leiktíð.

"Stjórinn vill að við spilum sóknarbolta og það er mjög spennandi. Í fyrra snerist allt um liðsandann, skipulag og varnarleik og við vorum allt of varkárir. Grant breytti ekki miklu frá því sem var undir stjórn Mourinho, en Scolari er að breyta þessu. Núna spilum við alltaf með tvo framherja og allir fá það hlutverk að reyna að sækja," sagði Kalou.