Rooney ekki refsað fyrir að kyssa merkið

Enska knattspyrnusambandið hyggst ekki grípa til neinna aðgerða gegn Wayne Rooney sem ögraði stuðningsmönnum Everton um helgina. Rooney kyssti merki Manchester United og horfði í átt að stuðningsmönnum síns fyrrum félags.

Rooney var mjög pirraður í leiknum og var tekinn af velli eftir að hafa brotið á Mikel Arteta í leiknum en hann var þá búinn að fá gult spjald. Sir Alex Ferguson viðurkenndi að hafa tekið Rooney af velli til að koma í veg fyrir að hann fengi rautt spjald.