Eldsneyti flutt frá Ísrael til Gaza í morgun

Eldsneyti var flutt frá Ísrael yfir til Gaza í morgun og verður meðal annars notað til að kynda rafstöð sem sér íbúum Gaza fyrir rafmagni.

Landamærin milli Gaza og Egyptalands eru enn opin en Egyptar hafa reynt með ýmsum ráðum að takmarka umferð um þau. Þrátt fyrir það mátti í dag sjá fólk fara með varning frá Egyptalandi yfir til Gaza.

Sex dagar eru síðan Hamas-liðar, sem ráða ríkjum í Gaza, sprengdu gat á landamæramúrinn. Vinsældir Hamas-samtakanna hafa aukist á Gaza við þessar aðgerðir og á næstu dögum fara fulltrúar samtakanna til Egyptalands til að krefjast þess að eiga aðild að vörslu landamæranna í framtíðinni.