Íslendingur mátti svara niðrandi orðum Þjóðverja

Héraðsdómur Reykjavíkur hefur vísað frá dómi kröfu Þjóðverja um að ummæli Íslendings í tölvubréfi til fólks sem þeir þekkja yrðu dæmd dauð og ómerk.

Mennirnir tveir eru stjórnarmenn í Evrópusamtökum fatlaðra golfáhugamanna og sendi sá þýski tölvupóst sumarið 2006 til annars manns í samtökunum þar sem varað var við tveimur nýjum stjórnarmönnum í samtökunum.

Við þessu brást Íslendingurinn og sendi tölvupóst til nokkurra aðila þar sem meðal annars kom fram að Þjóðverjinn hefði verið dæmdur fyrir að sitja um fólk og að hann ætti við mikil andleg veikindi að stríða. Vegna þessara orða stefndi sá þýski Íslendingnum og vildi að orð hans yrðu dæmd dauð og ómerk. Enn fremur að Íslendingurinn yrði dæmdur til þyngstu refsingar og að til að greiða hálfa milljón í miskabætur vegna ærumeiðinga.

Refsikröfu Þjóðverjans var vísað frá vegna þess að hann höfðaði ekki málið innan tilskilins tíma. Þá vísaði Héraðsdómur Reykjavíkur í dóm Landsréttar í Würzburg í Þýskalandi þar sem ráða mætti að sá þýski hefði átt við sálræn veikindi að stríða. Í hinu íslenska máli lægju hins vegar engin göfn fyrir um andlegt heilsufar hans. Íslendingurinn hefði ekki fært sönnur fyrri fullyrðingum sínum.

Hins vegar sagði dómurinn að líta yrði á ummælin í samhengi. Tölvupóstur Íslendingsins hefði verið svar við tölvupósti Þjóðverjans um tvo nýja stjórnarmenn í Evrópusamtökum fatlaðra golfáhugamanna en þau hefðu verið sérlega meiðandi. Þjóðverjanum hefði tæplega getað dulist að við svo óvægnum og harkalegum árásum á persónur þeirra sem í hlut áttu kynni að verða brugðist af einhverjum þeirra sem fengu tölvupóst hans í hendur.

Íslendingurinn hefði sagst ekki hafa átt annarra kosta völ en að svara ásökunum Þjóðverjans í garð tvímenninganna. Taldi dómurinn því út frá íslenskum lögum að réttmætt tilefni hefði verið til orða Íslendingsins en þau hefðu ekki falið í sér þyngri dóm um Þjóðverjann en hann mátti vænta sem andsvars við tölvupósti sínum.