Stóri-Sam orðaður við Portsmouth

Peter Storrie framkvæmdastjóri Portsmouth útilokar ekki að félagið muni leita til Sam Allardyce, fyrrum stjóra Bolton og Newcastle, til að fylla skarð Harry Redknapp sem fór til Tottenham um helgina.

Þá hefur Avram Grant fyrrum stjóri Chelsea einnig verið orðaður við Portsmouth, en hann hefur áður unnið fyrir félagið.

Framkvæmdastjóri félagsins sagði menn enn vera að átta sig á hraðri atburðarás helgarinnar en reiknaði með að félagið tæki sér nokkra daga í að meta stöðuna.

Hann ítrekaði að félagið myndi gera allt sem í valdi þess stæði til að halda í lykilleikmenn liðsins, en breskir fjölmiðlar hafa strax orðað bestu menn Portsmouth við Tottenham í janúar.

Menn eins og Peter Crouch og Jermain Defoe hafa enda haldið því fram í fjölmiðlum síðustu misseri að það hafi mikið til verið vegna Redknapp sem þeir ákváðu að ganga í raðir Portsmouth.