Sprengja sex til sjö hundruð tonn af flugeldum

Bardagatertur, skotkökur og risatertur hafa átt vaxandi vinsældum að fagna meðal almennings og því er líklegt að víða standi tómir tertukassar á nýársdagsmorgni. Mælst er til þess að kaupendur flugelda fari sjálfir með umbúðir og aðrar skotleifar í endurvinnslustöðvar Sorpu.

Þetta kemur fram á vef Reykjavíkurborgar. Þar segir að þrátt fyrir dregið hafi verulega úr innflutningi á flugeldum sé búist við að kveikt verði í sex til sjö hundruð tonnum af flugeldum í kringum áramótin.

„Íbúar á Höfuðborgarsvæðinu eru því hvattir til þess að skila umbúðum og leifum af flugeldum og tertum á endurvinnslustöðvar Sorpu sem opna 2. janúar.

Flugeldar eiga ekki að fara í sorptunnur heimila. Þær myndu fyllast skjótlega og einnig er hætta á íkveikju. Meginreglan er að íbúar í hverju borgarhverfi hreinsi sjálfir sitt nánasta umhverfi eftir að hafa kvatt gamla árið með flugeldum og fari með leifarnar í Sorpu 2. janúar.

Búast má við svifryksmengun á gamlárskvöld og nýársnótt því skottertur og blys valda miklum reyk. Heilsuverndarmörk fyrir svifryk eru 50 míkrógrömm á rúmmetra. Svifryk hefur farið yfir heilsuverndarmörk á nýársdag undanfarin ár. Spáð er austan kalda um áramót og að vindur verði 5-8 m/s."