Ekki búið að ákveða hvort staða bankastjóra verði auglýst

Engin ákvörðun hefur verið tekin um hvort bankastjórastaða Nýja Glitnis verði auglýst. Birna Einarsdóttir var skipuð bankastjóri skömmu eftir yfirtöku ríkisins á bankanum en þá var staðan ekki auglýst. Ekki náðist í stjórnarformenn hinna bankanna.

„Það hefur engin slík ákvörðun verið tekin," sagði Valur Valsson stjórnarformaður Nýja Glitnis í samtali við Vísi aðspurður hvenær staða bankastjóra yrði auglýst.

Hann sagði einnig að stjórn bankans hefði ekki tekið neina ákvörðun um hvort staðan yrði auglýst yfir höfuð.

Ekki hefur náðst í Ásmund Stefánsson formann stjórnar Nýja Landsbankans né Magnús Gunnarsson stjórnarfomann Nýja Kaupþings.